AI for reiselivet: Konkrete tips og metodar
AI kan frigjera tid og ressursar – men veit du korleis? På Hardanger Next får reiselivet konkrete tips og metodar.
AI kan frigjera tid og ressursar – men veit du korleis? På Hardanger Next får reiselivet konkrete tips og metodar.
Kunstig intelligens, eller AI som dei fleste kallar det, har dei siste åra gått frå å vera eit “hypeord” til å verta eit heilt sentralt verktøy som hjelper deg med å jobba smartare, spara tid og få meir ut av ressursane dine. Samstundes er det såpass nytt at mange i reiselivet anten ikkje har tatt det i bruk enno - eller har prøvd det utan å sjå den verkelege nytta.
Det vil Sjur Vågen og Andreas Skogseth i Visit Hardangerfjord gjera noko med under Hardanger Next. Der skal dei visa deg korleis du kan bruka AI for å auka kvaliteten på produktet/tilbodet ditt slik at du får meir tid til å gjera det som verkeleg betyr noko; nemleg å bruka meir tid på gjestane dine.
For berre nokre få år sidan var kunstig intelligens noko dei fleste tenkte på som “nokre avanserte greier” berre dei største teknologiselskapa var opptatt av. Mange sit nok framleis på den tanken, men no har det utvikla seg til å verta ein stor og tilgjengeleg ressurs for alle - også for reiselivet i Hardanger-regionen.
– AI har gått frå å vera noko mange var skeptiske til, til å bli eit heilt essensielt verktøy for oss i Visit Hardangerfjord. Det me før brukte timar – eller i nokre tilfelle dagar på - kan no løysast før kaffien min rekk å verta kald, seier Vågen.
Les også: Slik får du turistar til å stoppa opp i feeden din
AI er no den største og viktigaste “hjelpande handa” Visit Hardangerfjord har fått dei siste åra. Når destinasjonsselskapet snakkar med samarbeidspartnarane sine, er det derimot fleire som melder at dei ikkje har tatt det i bruk enno. Eller at dei har prøvd det, men føler at det ikke har vore til hjelp.
– Dette fortel oss at me må visa kva moglegheiter som ligg her. AI har vore ein enorm ressurs for oss i Visit Hardangerfjord, og me er heilt sikre på at dette kan vera til stor hjelp for alle aktørar i reiselivsnæringa. Me vil dela våre erfaringar og koma med konkrete tips og bruksområde for å det i bruk, forklarar Skogseth.
Både Vågen og Skogseth har jobba aktivt med kunstig intelligens heilt sidan startgropa. Begge kan skilta med å rådføra verksemder med korleis ein kan bruka AI, og dei har ved fleire høve vore med på konferansar og workshops for å auka kompetansen sin på dette området.
– På mange måtar er det eigentleg berre fantasien som set grenser for korleis du enkelt kan ta det i bruk. Nokre bruksområde er ganske “opplagte”, som til dømes oversetjing av tekstar til ulike språk. Andre bruksområde krever kanskje at du skjønar meir kva du kan bruka det til og korleis det vil hjelpa deg, seier Vågen.
Frå kontraktsarbeid og e-postar til reiserekningar og Instagram-innlegg. Alt dette - og vanvittig mykje meir - kan ei AI-teneste avlasta deg med. Det kan vera ein sparringspartnar og assistent som frigjer tid og ressursar til det som verkeleg betyr noko.
– Eksempelvis trur eg at mange ikkje tenkjer på at med AI kan du oppretta virtuelle kundar og fokusgrupper basert på enorme mengder data. Vil denne nye guida turen din slå an? Er prisen rett? Korleis vil ein bestemt målgruppe reagera på produktet ditt? Tidlegare måtte ein kanskje prøva og feila i marknaden, men no kan du testa alt dette - og mykje meir - før du brukar ei krone på marknadsføring, eksemplifiserer Skogseth.
Les også: Klimaet endrar seg – slik må reiselivet tilpassa seg
For mange følest det kanskje overveldande å byrja med AI, men Vågen og Skogseth understrekar at det ikkje handlar om å erstatta folk eller automatisera vekk den menneskelege delen av reiselivet. Snarare tvert imot.
– AI er ikkje ei permanent løysing, men eit verktøy som gjer deg meir effektiv. Det handlar ikkje om å erstatta kreativitet og erfaring, men om å bruka teknologien til å styrka det du allereie gjer. Det er berre eit spørsmål om tid før du nesten må bruka det for å henga med. Difor er det mykje å henta på å byrja allereie no, seier Vågen.
Og kanskje er det nettopp du som sit på den største moglegheita?
Vil du læra korleis AI kan gjera bedrifta di meir effektiv, smartare og meir lønnsam? Då må du få med deg Hardanger Next 26.-27. mars 2025 på Hardangerfjord Hotell i Øystese!