Vi er no godt i gang med arbeidet med ny regional reiselivsstrategi for Hardanger. Nyleg har vi gjennomført folkemøter for innbyggarane, og innspela derfrå blir tekne med vidare i prosessen. No går vi vidare med ei eiga innspelsrunde for reiselivsnæringa.

Trykk HER for å sende inn innspel.

Fleire verksemder har alt delt innspel, og vi byggjer vidare både på desse og på innsikta frå forprosjektet, der næringa peikte på tema som infrastruktur, besøksforvaltning, marknad, produktutvikling og kompetansebehov. No ønskjer vi å få inn endå fleire perspektiv frå aktørar i heile regionen.

Reiselivet i Hardanger er i sterk vekst, og mange verksemder opplever stor etterspurnad, særleg frå internasjonale gjester. Samtidig møter næringa fleire praktiske utfordringar i kvardagen – som transport og framkome, sesongvariasjonar, tilgang på arbeidskraft og bustader, kapasitet i høgsesong og behov for tydelegare samarbeid på tvers av aktørar og reisemål. Slike forhold påverkar både drift, lønsemd og moglegheiter for vidare utvikling, og vi treng oppdatert kunnskap frå næringa sjølv for å forstå situasjonen betre.

Det er særleg nyttig å få vurderingar av kva moglegheiter de ser for eigen verksemd og for Hardanger som reisemål framover, og kva som kan bli krevjande i åra som kjem. Vi ønskjer òg innspel på tiltak og prioriteringar de meiner er viktige for å styrke regionen – anten det handlar om infrastruktur, samarbeid, kompetanse, produktutvikling eller rammevilkår.

I januar blir det òg invitert til digitale innspelsmøter for næringa. Desse møta gir rom for dialog, drøftingar og utdjupande innspel. Informasjon om tidspunkt og påmelding blir sendt ut i desember.

Innspela som kjem inn no blir sett saman med tidlegare erfaringar og inngår direkte i det vidare strategiarbeidet.

Trykk HER for å sende inn innspel. De kan svare kort eller meir utfyllande – begge delar er nyttige. Alle innspel blir lese og tekne med vidare i arbeidet.

‍

Har du spørsmål om arbeidet med regional reiselivsstrategi? Ta kontakt med Margit Lund Mikkelson  +47 911 51 009