Midt i Bergen sentrum, i turistinformasjonen på Strandkaien, har Visit Hardangerfjord si eiga utstilling – Hardanger-delen. Om lag 500 000 besøkande er innom turistinformasjonen kvart år, og utstillinga har ei sentral plassering heilt fremst i lokalet, like ved inngangen. Det er ein utstillingsplass få andre regionar har, og han er open for medlemsverksemdene våre.

Gjestene som kjem hit, er allereie på Vestlandet, og mange har framleis delar av reisa føre seg. Fleire kjem innom turistinformasjonen for å spørja om nettopp Hardanger. Gjennom utstillinga kan me inspirera dei til å utforska regionen og gjera det enklare å finna aktuelle opplevingar, aktivitetar og overnattingstilbod.

Slik kan verksemda di vera med

Utstillinga har fire montrar som me leiger ut til medlemsverksemder, i tillegg til storskjerm og brosjyrehyller. Som utstillar får du:

• Eigen monter, foliert med bodskapen og bileta dine, synleg gjennom heile året.
• Synlegheit på storskjerm, med moglegheit for film og QR-kode direkte til booking eller nettside.
• Plass til brosjyrar.

Det er også mogleg å dela ein monter mellom to aktørar som høyrer naturleg saman, til dømes ei oppleving og ein overnattingsstad i same område. Visit Hardangerfjord kan ved behov hjelpa med utforming og tilrettelegging av innhald til monter og til storskjermen.

Dette gir verksemda di høve til å bli synleg for reisande som allereie er på Vestlandet, og som kan vera på utkikk etter nye opplevingar eller stader å besøkja.

Oppgradert i 2026

I år har me gjort nokre oppgraderingar av utstillingsområdet. Det gamle epletreet i taket er fjerna, veggene er måla og lokalet er opna opp, slik at montrane og skjermane kjem betre til sin rett.

I år kom ein ny storskjerm på plass. Me jobbar med nytt innhald og fleire grep som skal gjera Hardanger-delen endå meir synleg og interessant for dei besøkande.

Ledige plassar for 2027

Me har plass til nye utstillarar frå 2027. Vil du visa fram verksemda di for reisande som vurderer å besøkja Hardanger, eller ynskjer du å sjå utstillingsplassen før du bestemmer deg? Ta kontakt med Irene Schrøder på irene@hardangerfjord.com for meir informasjon om vilkår, innhald og praktisk gjennomføring.