Fredag 6. november møtte Hardanger den franske reiselivsbransjen i residensen til Noregs ambassadør i Paris. Workshopen arrangerte vi saman med Innovasjon Norge og den norske ambassaden i Frankrike, og det er første gong regionen stiller samla i den franske marknaden. Oppslutninga var stor: rundt 25 påmelde frå over tjue franske selskap – Norden-spesialistar, aktivitetsoperatørar, skreddarsaum-aktørar, MICE-byrå og reisemedia.

Tretten verksemder frå Hardanger og Haugalandet var med, frå historiske fjordhotell til opplevingsselskap, attraksjonar og booking. Kvar bedrift fekk presentere seg før møta starta ved borda. Noregs ambassadør til Frankrike, Vegar Brynildsen, opna dagen og deltok i møta utover dagen.

Ein workshop som dette handlar om meir enn salsmøte. Han er òg merkevarebygging: vi viser fram det som er unikt for Hardanger og skil oss frå andre fjordregionar. Christer Økland frå Fjordtind Hotels introduserte Sider frå Hardanger, Alexander Røynstrand tok imot gjestane med hardingfele, og regionen vart presentert som éin heilskap – natur, kultur og mat, to timar frå Bergen.

Franskmennene kjem – men ikkje til Hardanger enno

Franske gjestedøgn i Noreg har auka med 38 prosent sidan 2019, til 622 000 i fjor, og Frankrike er no den sjuande største utanlandsmarknaden. Franske gjestar reiser mest frå mai til oktober og blir lenge – nær fire av ti blir åtte netter eller meir. Hardanger har til no berre ein liten del av denne trafikken, med rundt 10 000 franske gjestedøgn i året. Det er nettopp difor potensialet er stort: franskmennene er alt i Bergen, to timar unna, og vi jobbar aktivt for å få fleire av dei vidare inn i fjorden.

Hardanger treffer dessutan trendane i den franske marknaden nesten punkt for punkt. Natur er avgjerande for val av reisemål for 63 prosent av franskmennene, berekraft tyder stadig meir – Noreg blir oppfatta som eit av dei mest berekraftige reisemåla – og etterspurnaden går mot autentiske opplevingar med kultur og lokal mat. Samstundes veks «coolcation»-trenden, der franskmenn byter ut Middelhavet med kjøligare reisemål i nord, og stadig fleire vil unngå overturisme og folkemengder. Fjord, bre og fjell, sider frå Hardanger og levande kulturtradisjonar i ein region som framleis blir opplevd som uforstyrra – det er posisjonen vi byggjer merkevaren Hardanger på i Frankrike.

Dagen før samla vi deltakarane til fagsamling med eventbyrået Article Onze, som gav innsikt i korleis franske operatørar arbeider og kva dei ser etter.

Takk til samarbeidspartnarane

Vi takkar verksemdene frå Hardanger som stilte opp, og Visit Haugesund som var med frå naboregionen i sør. Takk til Innovasjon Norge i Frankrike og den norske ambassaden for støtta og vertskapet, og til Article Onze for gjennomføringa. No følgjer vi opp kontaktane frå Paris saman med dei, og deltakarlista blir delt med verksemdene som var med. Hege Vedvik er kontaktperson for travel trade.