Hausten 2025 har Visit Hardangerfjord gjennomført åtte opne folkemøte i alle kommunane som er ein del av reiselivsstrategien. Me har besøkt Eidfjord, Jondal, Kvam, Kvinnherad, Lofthus, Odda, Tyssedal og Ulvik – og over 170 innbyggarar møtte engasjert opp til møta.

Møta var både kjekke og viktige for oss. Reiselivet skjer midt i kvardagen til folk – på vegar, stiar, i sentrum og i naturen rundt oss. Difor må ein regional reiselivsstrategi byggje på innsikt frå både innbyggarar, næringsliv og kommunar, og ta utgangspunkt i erfaringane til dei som kjenner reiselivet tett på.

Innspela frå møta viser stort engasjement, eit tydeleg verdigrunnlag – og ei klar vilje til å vere med og påverka utviklinga av Hardanger som både bu- og besøksstad.

‍

Eit gjennomgåande bilete: Hardanger er attraktivt, men tåleevna er ulik

‍

Uavhengig av kommune peikar deltakarane på dei same utfordringane:

• ‍Trafikk og trengsel i høgsesong, særleg langs RV13 og ved populære turmål
• For lite parkering, og manglande tilrettelegging rundt sentrum og stiar
• Villcamping og dårleg toalett- og avfallshandtering
• Turistar som kjem tett på privatliv
• Manglande skilting og informasjon, både om parkering, stiar og allemannsrett
• Trykket på enkelte stader har blitt for stort, med tydeleg slitasje og konfliktar
• Uro for bustadmarknaden, særleg i kommunar med mykje Airbnb

‍

Mange fortel at kvardagen blir krevjande når trafikken stoppar opp,  når toalettkapasiteten ikkje strekk til, eller når turistar går gjennom tun og hagar for å finne “det perfekte utsiktspunktet”.

Det betyr ikkje at folk er negative til reiseliv. Tvert imot – dei fleste er tydelege på kor viktig det er for Hardanger. Samstundes ønskjer dei at vi utviklar det på ein klok måte, utan at det går utover natur, trivsel og kvardagsliv.

‍

‍

Kvifor vil vi ha reiseliv?

Innbyggarane peikar på dei same gevinstane, og det er brei semje om kvifor reiselivet er viktig:

• Arbeidsplassar og lokal verdiskaping
• Grunnlag for butikkar, kafear og møteplassar
• Stoltheit og identitet – det er fint å vise fram Hardanger
• Impulsar og kulturutveksling
• Fleire tilbod for både innbyggarar og gjester
• Trekkraft for unge som vil flytte heim – og sesongarbeidarar som blir buande

Dette går igjen i alle kommunane: Reiselivet er ei av dei viktigaste næringane våre. Men det må styrkjast på ein måte som skapar meirverdi, ikkje meir belastning.

Kva vil vi dele – og kva bør vi skjerme?

Størstedelen av møta gjekk føre seg som gruppearbeid, der alle sat rundt bord med kart over nærområdet sitt. Deltakarane fekk hjarte, grøne piler og stjerner som dei klistra på kartet: Hjarte markerte stader dei ønskjer å halde for seg sjølve, grøne piler viste kva dei gjerne vil dele med gjestane, og stjernene peika ut det som er ekstra viktig å ta vare på framover. Øvinga gav eit tydeleg og samla bilete av kva innbyggarane meiner er viktig.

Dette vil vi ta vare på:

• Viktige kulturminne, lokalhistorie og sentrumsmiljø
• Natur som er under press og treng styring og vern
• Bustadområde og hyttefelt

‍

Dette deler vi gjerne:

• Fjorden og dei etablerte turmåla
• Sidergardar, lokal mat og kulturarv
• Museum, industrihistorie og festivalar
• Tilrettelagte stiar og aktivitetar
• Ferjer, sentrum og opplevingar som allereie er berekraftig organisert

‍

Dette ønskjer vi å halde for oss sjølve:

• Kvardagsstiar og lokale småperler
• Stølsområde og hytteområde
• Eigne badeplassar og nærområde som ikkje toler masseturisme
• Stader som alt er ved smertegrensa

‍

‍

Konkrete forslag frå innbyggarane

Innbyggarane kom med ei lang liste av tiltak som dei meiner vil lette kvardagen og styrkje reiselivet. Her er nokon av hovudpunkta som går igjen:

Betre informasjon og skilting

• Tydelegare føring om parkering, allemannsretten, båndtvang og villreinomsyn
• Gode kart over toalett, stiar og transport
• Betre informasjon ved Folgefonna, Dronningstien, Husedalen og Buer

‍

Infrastruktur

• Betre trafikkavvikling og samordna parkering
• Shuttle-løysingar til dei mest besøkte turmåla
• Fleire toalett og avfallsløysingar
• Betre vegstandard og trygge løysingar for mjuke trafikkantar

‍

Samordning og samarbeid

• Betre koordinering mellom kommunane
• Betre dialog mellom næringsaktørar, grunneigarar og kommune
• Forslag om ein felles Hardanger-app (info, kapasitet, toalett, stiar, transport)

‍

Reiseliv heile året

• Fleire arrangement, mindre trengsel i sommarsesongen
• Satsing på kurs og konferanse
• Meir bruk av lokale kulturarenaer og møteplassar

‍

Ein viktig bodskap: Hardanger skal vere ein god stad å bu– og ein god stad å besøke

Sjølv om me fekk mange frustrasjonar og tydelege behov, er engasjementet først og fremst positivt. Folk bryr seg og vil bidra. Dei ønskjer eit reiseliv som spelar på lag med lokalsamfunnet.

‍

Tusen takk for engasjementet – vi set stor pris på kvar og ein som kom.

‍

Fekk du ikkje deltatt på møtet, eller har du tankar du ikkje fekk delt?

Fortvil ikkje – det er framleis mogleg å komme med innspel.

HER kan du dele det du meiner er viktig for framtidas reiseliv i Hardanger:

Vi ønskjer alle innspel velkomne!

‍

Har du spørsmål om arbeidet med regional reiselivsstrategi?

Ta kontakt med Margit Lund Mikkelson  +47 911 51 009

‍

‍

‍